Bibles in ancient languages
Ancient translations
Modern translations

Novum Testamentum Graecum Ephesians 2

New Testament
Chapter
Verses
1
Καὶ ὑμᾶς ὄντας νεκροὺς τοῖς παραπτώμασιν καὶ ταῖς ἁμαρτίαις ὑμῶν,

Kaì hymâs óntas nekroùs toîs paraptṓmasin kaì taîs hamartíais hymō̂n,

2
ἐν αἷς ποτε περιεπατήσατε κατὰ τὸν αἰῶνα τοῦ κόσμου τούτου, κατὰ τὸν ἄρχοντα τῆς ἐξουσίας τοῦ ἀέρος, τοῦ πνεύματος τοῦ νῦν ἐνεργοῦντος ἐν τοῖς υἱοῖς τῆς ἀπειθείας·

en haîs pote periepatḗsate katà tòn aiō̂na toû kósmou toútou, katà tòn árchonta tē̂s exousías toû aéros, toû pneúmatos toû nŷn energoûntos en toîs hyioîs tē̂s apeitheías:

3
ἐν οἷς καὶ ἡμεῖς πάντες ἀνεστράφημέν ποτε ἐν ταῖς ἐπιθυμίαις τῆς σαρκὸς ἡμῶν, ποιοῦντες τὰ θελήματα τῆς σαρκὸς καὶ τῶν διανοιῶν, καὶ ἤμεθα τέκνα φύσει ὀργῆς ὡς καὶ οἱ λοιποί·

en hoîs kaì hēmeîs pántes anestráphēmén pote en taîs epithymíais tē̂s sarkòs hēmō̂n, poioûntes tà thelḗmata tē̂s sarkòs kaì tō̂n dianoiō̂n, kaì ḗmetha tékna phýsei orgē̂s hōs kaì hoi loipoí:

4
ὁ δὲ θεὸς πλούσιος ὢν ἐν ἐλέει, διὰ τὴν πολλὴν ἀγάπην αὐτοῦ ἣν ἠγάπησεν ἡμᾶς,

ho dè theòs ploúsios ṑn en eléei, dià tḕn pollḕn agápēn autoû hḕn ēgápēsen hēmâs,

5
καὶ ὄντας ἡμᾶς νεκροὺς τοῖς παραπτώμασιν συνεζωοποίησεν τῷ Χριστῷ – χάριτί ἐστε σεσῳσμένοι –

kaì óntas hēmâs nekroùs toîs paraptṓmasin synezōopoíēsen tō̂i Christō̂i – chárití este sesōisménoi –

6
καὶ συνήγειρεν καὶ συνεκάθισεν ἐν τοῖς ἐπουρανίοις ἐν Χριστῷ ’Ιησοῦ,

kaì synḗgeiren kaì synekáthisen en toîs epouraníois en Christō̂i ’Iēsoû,

7
ἵνα ἐνδείξηται ἐν τοῖς αἰῶσιν τοῖς ἐπερχομένοις τὸ ὑπερβάλλον πλοῦτος τῆς χάριτος αὐτοῦ ἐν χρηστότητι ἐφ’ ἡμᾶς ἐν Χριστῷ ’Ιησοῦ.

hína endeíxētai en toîs aiō̂sin toîs eperchoménois tò hyperbállon ploûtos tē̂s cháritos autoû en chrēstótēti eph’ hēmâs en Christō̂i ’Iēsoû.

8
τῇ γὰρ χάριτί ἐστε σεσῳσμένοι διὰ πίστεως· καὶ τοῦτο οὐκ ἐξ ὑμῶν, θεοῦ τὸ δῶρον·

tē̂i gàr chárití este sesōisménoi dià písteōs: kaì toûto ouk ex hymō̂n, theoû tò dō̂ron:

9
οὐκ ἐξ ἔργων, ἵνα μή τις καυχήσηται.

ouk ex érgōn, hína mḗ tis kauchḗsētai.

10
αὐτοῦ γάρ ἐσμεν ποίημα, κτισθέντες ἐν Χριστῷ ’Ιησοῦ ἐπὶ ἔργοις ἀγαθοῖς οἷς προητοίμασεν ὁ θεὸς ἵνα ἐν αὐτοῖς περιπατήσωμεν.

autoû gár esmen poíēma, ktisthéntes en Christō̂i ’Iēsoû epì érgois agathoîs hoîs proētoímasen ho theòs hína en autoîs peripatḗsōmen.

11
Διὸ μνημονεύετε ὅτι ποτὲ ὑμεῖς τὰ ἔθνη ἐν σαρκί, οἱ λεγόμενοι ἀκροβυστία ὑπὸ τῆς λεγομένης περιτομῆς ἐν σαρκὶ χειροποιήτου,

Diò mnēmoneúete hóti potè hymeîs tà éthnē en sarkí, hoi legómenoi akrobystía hypò tē̂s legoménēs peritomē̂s en sarkì cheiropoiḗtou,

12
ὅτι ἦτε τῷ καιρῷ ἐκείνῳ χωρὶς Χριστοῦ, ἀπηλλοτριωμένοι τῆς πολιτείας τοῦ ’Ισραὴλ καὶ ξένοι τῶν διαθηκῶν τῆς ἐπαγγελίας, ἐλπίδα μὴ ἔχοντες καὶ ἄθεοι ἐν τῷ κόσμῳ.

hóti ē̂te tō̂i kairō̂i ekeínōi chōrìs Christoû, apēllotriōménoi tē̂s politeías toû ’Israḕl kaì xénoi tō̂n diathēkō̂n tē̂s epangelías, elpída mḕ échontes kaì átheoi en tō̂i kósmōi.

13
νυνὶ δὲ ἐν Χριστῷ ’Ιησοῦ ὑμεῖς οἵ ποτε ὄντες μακρὰν ἐγενήθητε ἐγγὺς ἐν τῷ αἵματι τοῦ Χριστοῦ.

nynì dè en Christō̂i ’Iēsoû hymeîs hoí pote óntes makràn egenḗthēte engỳs en tō̂i haímati toû Christoû.

14
Αὐτὸς γάρ ἐστιν ἡ εἰρήνη ἡμῶν, ὁ ποιήσας τὰ ἀμφότερα ἓν καὶ τὸ μεσότοιχον τοῦ φραγμοῦ λύσας, τὴν ἔχθραν, ἐν τῇ σαρκὶ αὐτοῦ,

Autòs gár estin hē eirḗnē hēmō̂n, ho poiḗsas tà amphótera hèn kaì tò mesótoichon toû phragmoû lýsas, tḕn échthran, en tē̂i sarkì autoû,

15
τὸν νόμον τῶν ἐντολῶν ἐν δόγμασιν καταργήσας, ἵνα τοὺς δύο κτίσῃ ἐν αὑτῷ εἰς ἕνα καινὸν ἄνθρωπον ποιῶν εἰρήνην,

tòn nómon tō̂n entolō̂n en dógmasin katargḗsas, hína toùs dýo ktísēi en hautō̂i eis héna kainòn ánthrōpon poiō̂n eirḗnēn,

16
καὶ ἀποκαταλλάξῃ τοὺς ἀμφοτέρους ἐν ἑνὶ σώματι τῷ θεῷ διὰ τοῦ σταυροῦ, ἀποκτείνας τὴν ἔχθραν ἐν αὐτῷ.

kaì apokatalláxēi toùs amphotérous en henì sṓmati tō̂i theō̂i dià toû stauroû, apokteínas tḕn échthran en autō̂i.

17
καὶ ἐλθὼν εὐηγγελίσατο εἰρήνην ὑμῖν τοῖς μακρὰν καὶ εἰρήνην τοῖς ἐγγύς·

kaì elthṑn euēngelísato eirḗnēn hymîn toîs makràn kaì eirḗnēn toîs engýs:

18
ὅτι δι’ αὐτοῦ ἔχομεν τὴν προσαγωγὴν οἱ ἀμφότεροι ἐν ἑνὶ πνεύματι πρὸς τὸν πατέρα.

hóti di’ autoû échomen tḕn prosagōgḕn hoi amphóteroi en henì pneúmati pròs tòn patéra.

19
ἄρα οὖν οὐκέτι ἐστὲ ξένοι καὶ πάροικοι, ἀλλὰ ἐστὲ συμπολῖται τῶν ἁγίων καὶ οἰκεῖοι τοῦ θεοῦ,

ára oûn oukéti estè xénoi kaì pároikoi, allà estè sympolîtai tō̂n hagíōn kaì oikeîoi toû theoû,

20
ἐποικοδομηθέντες ἐπὶ τῷ θεμελίῳ τῶν ἀποστόλων καὶ προφητῶν, ὄντος ἀκρογωνιαίου αὐτοῦ Χριστοῦ ’Ιησοῦ,

epoikodomēthéntes epì tō̂i themelíōi tō̂n apostólōn kaì prophētō̂n, óntos akrogōniaíou autoû Christoû ’Iēsoû,

21
ἐν ᾧ πᾶσα οἰκοδομὴ συναρμολογουμένη αὔξει εἰς ναὸν ἅγιον ἐν κυρίῳ,

en hō̂i pâsa oikodomḕ synarmologouménē aúxei eis naòn hágion en kyríōi,

22
ἐν ᾧ καὶ ὑμεῖς συνοικοδομεῖσθε εἰς κατοικητήριον τοῦ θεοῦ ἐν πνεύματι.

en hō̂i kaì hymeîs synoikodomeîsthe eis katoikētḗrion toû theoû en pneúmati.