Bibles in ancient languages
Old translations
Modern translations

Biblia Hebraica Stuttgartiensia 2 Kings 22

Torah
Earlier Prophets (Neviim Rishonim)
Writings
Later Prophets (Neviim Aharonim)
Chapter
Verses
1
בֶּן־שְׁמֹנֶ֤ה שָׁנָה֙ יֹאשִׁיָּ֣הוּ בְמָלְכֹ֔ו וּשְׁלֹשִׁ֤ים וְאַחַת֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמֹּ֔ו יְדִידָ֥ה בַת־עֲדָ֖יָה מִבָּצְקַֽת׃

bėn־şĕ̌mòne֤h şá̌náh֙ yòʼşǐyá֣̇hẇ bĕmálĕkò֔w ẇşĕ̌lòşǐ֤ym wĕʼaẖaţ֙ şá̌ná֔h mála֖kĕ bi̇yrẇşá̌liá֑m wĕşé֣̌m ʼimò̇֔w yĕdiydá֥h baţ־ʻàdá֖yáh mibá̇ẕĕqaֽţ׃

2
וַיַּ֥עַשׂ הַיָּשָׁ֖ר בְּעֵינֵ֣י יְהוָ֑ה וַיֵּ֗לֶךְ בְּכָל־דֶּ֨רֶךְ֙ דָּוִ֣ד אָבִ֔יו וְלֹא־סָ֖ר יָמִ֥ין וּשְׂמֹֽאול׃ פ

wayȧ֥ʻaş̂ hayá̇şá֖̌r bĕ̇ʻéyné֣y yĕhwá֑h wayé̇֗lekĕ bĕ̇kál־dė֨rekĕ֙ dá̇wi֣d ʼábi֔yw wĕlòʼ־sá֖r yámi֥yn ẇşĕ̂mòֽʼwl׃ p

3
וַיְהִ֗י בִּשְׁמֹנֶ֤ה עֶשְׂרֵה֙ שָׁנָ֔ה לַמֶּ֖לֶךְ יֹאשִׁיָּ֑הוּ שָׁלַ֣ח הַ֠מֶּלֶךְ אֶת־שָׁפָ֨ן בֶּן־אֲצַלְיָ֤הוּ בֶן־מְשֻׁלָּם֙ הַסֹּפֵ֔ר בֵּ֥ית יְהוָ֖ה לֵאמֹֽר׃

wayĕhi֗y bi̇şĕ̌mòne֤h ʻeşĕ̂réh֙ şá̌ná֔h lamė֖lekĕ yòʼşǐyá֑̇hẇ şá̌la֣ẖ ha֠mėlekĕ ʼeţ־şá̌pá֨n bėn־ʼàẕalĕyá֤hẇ ben־mĕşǔlá̇m֙ hasò̇pé֔r bé֥̇yţ yĕhwá֖h léʼmòֽr׃

4
עֲלֵ֗ה אֶל־חִלְקִיָּ֨הוּ֙ הַכֹּהֵ֣ן הַגָּדֹ֔ול וְיַתֵּ֣ם אֶת־הַכֶּ֔סֶף הַמּוּבָ֖א בֵּ֣ית יְהוָ֑ה אֲשֶׁ֥ר אָסְפ֛וּ שֹׁמְרֵ֥י הַסַּ֖ף מֵאֵ֥ת הָעָֽם׃

ʻàlé֗h ʼel־ẖilĕqiyá̇֨hẇ֙ hakò̇hé֣n hagá̇dò֔wl wĕyaţé֣̇m ʼeţ־hakė֔sep haṁẇbá֖ʼ bé֣̇yţ yĕhwá֑h ʼàşě֥r ʼásĕp֛ẇ şò̌mĕré֥y hasȧ֖p méʼé֥ţ háʻáֽm׃

5
וְיִתְּנֹה עַל־יַד֙ עֹשֵׂ֣י הַמְּלָאכָ֔ה הַמֻּפְקָדִ֖ים בְּבֵית יְהוָ֑ה וְיִתְּנ֣וּ אֹתֹ֗ו לְעֹשֵׂ֤י הַמְּלָאכָה֙ אֲשֶׁר֙ בְּבֵ֣ית יְהוָ֔ה לְחַזֵּ֖ק בֶּ֥דֶק הַבָּֽיִת׃

wĕyiţĕ̇nòh ʻal־yad֙ ʻòşé֣̂y hamĕ̇láʼká֔h hamu̇pĕqádi֖ym bĕ̇béyţ yĕhwá֑h wĕyiţĕ̇n֣ẇ ʼòţò֗w lĕʻòşé֤̂y hamĕ̇láʼkáh֙ ʼàşěr֙ bĕ̇bé֣yţ yĕhwá֔h lĕẖazé֖̇q bė֥deq habáֽ̇yiţ׃

6
לֶחָ֣רָשִׁ֔ים וְלַבֹּנִ֖ים וְלַגֹּֽדְרִ֑ים וְלִקְנֹ֤ות עֵצִים֙ וְאַבְנֵ֣י מַחְצֵ֔ב לְחַזֵּ֖ק אֶת־הַבָּֽיִת׃

leẖá֣ráşǐ֔ym wĕlabò̇ni֖ym wĕlagòֽ̇dĕri֑ym wĕliqĕnò֤wţ ʻéẕiym֙ wĕʼabĕné֣y maẖĕẕé֔b lĕẖazé֖̇q ʼeţ־habáֽ̇yiţ׃

7
אַ֚ךְ לֹא־יֵחָשֵׁ֣ב אִתָּ֔ם הַכֶּ֖סֶף הַנִּתָּ֣ן עַל־יָדָ֑ם כִּ֥י בֶאֱמוּנָ֖ה הֵ֥ם עֹשִֽׂים׃

ʼa֚kĕ lòʼ־yéẖáşé֣̌b ʼiţá̇֔m hakė֖sep hani̇ţá֣̇n ʻal־yádá֑m ki֥̇y beʼèmẇná֖h hé֥m ʻòşîֽym׃

8
וַ֠יֹּאמֶר חִלְקִיָּ֜הוּ הַכֹּהֵ֤ן הַגָּדֹול֙ עַל־שָׁפָ֣ן הַסֹּפֵ֔ר סֵ֧פֶר הַתֹּורָ֛ה מָצָ֖אתִי בְּבֵ֣ית יְהוָ֑ה וַיִּתֵּ֨ן חִלְקִיָּ֧ה אֶת־הַסֵּ֛פֶר אֶל־שָׁפָ֖ן וַיִּקְרָאֵֽהוּ׃

wa֠yò̇ʼmer ẖilĕqiyá̇֜hẇ hakò̇hé֤n hagá̇dòwl֙ ʻal־şá̌pá֣n hasò̇pé֔r sé֧per haţò̇wrá֛h máẕá֖ʼţiy bĕ̇bé֣yţ yĕhwá֑h wayi̇ţé̇֨n ẖilĕqiyá֧̇h ʼeţ־hasé֛̇per ʼel־şá̌pá֖n wayi̇qĕráʼéֽhẇ׃

9
וַיָּבֹ֞א שָׁפָ֤ן הַסֹּפֵר֙ אֶל־הַמֶּ֔לֶךְ וַיָּ֥שֶׁב אֶת־הַמֶּ֖לֶךְ דָּבָ֑ר וַיֹּ֗אמֶר הִתִּ֤יכוּ עֲבָדֶ֨יךָ֙ אֶת־הַכֶּ֨סֶף֙ הַנִּמְצָ֣א בַבַּ֔יִת וַֽיִּתְּנֻ֗הוּ עַל־יַד֙ עֹשֵׂ֣י הַמְּלָאכָ֔ה הַמֻּפְקָדִ֖ים בֵּ֥ית יְהוָֽה׃

wayá̇bò֞ʼ şá̌pá֤n hasò̇pér֙ ʼel־hamė֔lekĕ wayá֥̇şěb ʼeţ־hamė֖lekĕ dá̇bá֑r wayò̇֗ʼmer hiţi֤̇ykẇ ʻàbáde֨yká֙ ʼeţ־hakė֨sep֙ hani̇mĕẕá֣ʼ babȧ֔yiţ waֽyi̇ţĕ̇nu֗hẇ ʻal־yad֙ ʻòşé֣̂y hamĕ̇láʼká֔h hamu̇pĕqádi֖ym bé֥̇yţ yĕhwáֽh׃

10
וַיַּגֵּ֞ד שָׁפָ֤ן הַסֹּפֵר֙ לַמֶּ֣לֶךְ לֵאמֹ֔ר סֵ֚פֶר נָ֣תַן לִ֔י חִלְקִיָּ֖ה הַכֹּהֵ֑ן וַיִּקְרָאֵ֥הוּ שָׁפָ֖ן לִפְנֵ֥י הַמֶּֽלֶךְ׃

wayȧgé̇֞d şá̌pá֤n hasò̇pér֙ lamė֣lekĕ léʼmò֔r sé֚per ná֣ţan li֔y ẖilĕqiyá֖̇h hakò̇hé֑n wayi̇qĕráʼé֥hẇ şá̌pá֖n lipĕné֥y hamėֽlekĕ׃

11
וַֽיְהִי֙ כִּשְׁמֹ֣עַ הַמֶּ֔לֶךְ אֶת־דִּבְרֵ֖י סֵ֣פֶר הַתֹּורָ֑ה וַיִּקְרַ֖ע אֶת־בְּגָדָֽיו׃

waֽyĕhiy֙ ki̇şĕ̌mò֣ʻa hamė֔lekĕ ʼeţ־di̇bĕré֖y sé֣per haţò̇wrá֑h wayi̇qĕra֖ʻ ʼeţ־bĕ̇gádáֽyw׃

12
וַיְצַ֣ו הַמֶּ֡לֶךְ אֶת־חִלְקִיָּ֣ה הַכֹּהֵ֡ן וְאֶת־אֲחִיקָ֣ם בֶּן־שָׁ֠פָן וְאֶת־עַכְבֹּ֨ור בֶּן־מִיכָיָ֜ה וְאֵ֣ת׀ שָׁפָ֣ן הַסֹּפֵ֗ר וְאֵ֛ת עֲשָׂיָ֥ה עֶֽבֶד־הַמֶּ֖לֶךְ לֵאמֹֽר׃

wayĕẕa֣w hamė֡lekĕ ʼeţ־ẖilĕqiyá֣̇h hakò̇hé֡n wĕʼeţ־ʼàẖiyqá֣m bėn־şá̌֠pán wĕʼeţ־ʻakĕbò̇֨wr bėn־miykáyá֜h wĕʼé֣ţ׀ şá̌pá֣n hasò̇pé֗r wĕʼé֛ţ ʻàşá̂yá֥h ʻeֽbed־hamė֖lekĕ léʼmòֽr׃

13
לְכוּ֩ דִרְשׁ֨וּ אֶת־יְהוָ֜ה בַּעֲדִ֣י וּבְעַד־הָעָ֗ם וּבְעַד֙ כָּל־יְהוּדָ֔ה עַל־דִּבְרֵ֛י הַסֵּ֥פֶר הַנִּמְצָ֖א הַזֶּ֑ה כִּֽי־גְדֹולָ֞ה חֲמַ֣ת יְהוָ֗ה אֲשֶׁר־הִיא֙ נִצְּתָ֣ה בָ֔נוּ עַל֩ אֲשֶׁ֨ר לֹֽא־שָׁמְע֜וּ אֲבֹתֵ֗ינוּ עַל־דִּבְרֵי֙ הַסֵּ֣פֶר הַזֶּ֔ה לַעֲשֹׂ֖ות כְּכָל־הַכָּת֥וּב עָלֵֽינוּ׃

lĕkẇ֩ dirĕş̌֨ẇ ʼeţ־yĕhwá֜h bȧʻàdi֣y ẇbĕʻad־háʻá֗m ẇbĕʻad֙ ká̇l־yĕhẇdá֔h ʻal־di̇bĕré֛y hasé֥̇per hani̇mĕẕá֖ʼ hazė֑h kiֽ̇y־gĕdòwlá֞h ẖàma֣ţ yĕhwá֗h ʼàşěr־hiyʼ֙ niẕĕ̇ţá֣h bá֔nẇ ʻal֩ ʼàşě֨r lòֽʼ־şá̌mĕʻ֜ẇ ʼàbòţé֗ynẇ ʻal־di̇bĕréy֙ hasé֣̇per hazė֔h laʻàşò֖̂wţ kĕ̇kál־haká̇ţ֥ẇb ʻáléֽynẇ׃

14
וַיֵּ֣לֶךְ חִלְקִיָּ֣הוּ הַ֠כֹּהֵן וַאֲחִיקָ֨ם וְעַכְבֹּ֜ור וְשָׁפָ֣ן וַעֲשָׂיָ֗ה אֶל־חֻלְדָּ֨ה הַנְּבִיאָ֜ה אֵ֣שֶׁת׀ שַׁלֻּ֣ם בֶּן־תִּקְוָ֗ה בֶּן־חַרְחַס֙ שֹׁמֵ֣ר הַבְּגָדִ֔ים וְהִ֛יא יֹשֶׁ֥בֶת בִּירוּשָׁלִַ֖ם בַּמִּשְׁנֶ֑ה וַֽיְדַבְּר֖וּ אֵלֶֽיהָ׃

wayé֣̇lekĕ ẖilĕqiyá֣̇hẇ ha֠kò̇hén waʼàẖiyqá֨m wĕʻakĕbò̇֜wr wĕşá̌pá֣n waʻàşá̂yá֗h ʼel־ẖulĕdá̇֨h hanĕ̇biyʼá֜h ʼé֣şěţ׀ şǎlu֣̇m bėn־ţi̇qĕwá֗h bėn־ẖarĕẖas֙ şò̌mé֣r habĕ̇gádi֔ym wĕhi֛yʼ yòşě֥beţ bi̇yrẇşá̌lia֖m bȧmi̇şĕ̌ne֑h waֽyĕdabĕ̇r֖ẇ ʼéleֽyhá׃

15
וַתֹּ֣אמֶר אֲלֵיהֶ֔ם כֹּֽה־אָמַ֥ר יְהוָ֖ה אֱלֹהֵ֣י יִשְׂרָאֵ֑ל אִמְר֣וּ לָאִ֔ישׁ אֲשֶׁר־שָׁלַ֥ח אֶתְכֶ֖ם אֵלָֽי׃

waţò֣̇ʼmer ʼàléyhe֔m kòֽ̇h־ʼáma֥r yĕhwá֖h ʼèlòhé֣y yişĕ̂ráʼé֑l ʼimĕr֣ẇ láʼi֔yş̌ ʼàşěr־şá̌la֥ẖ ʼeţĕke֖m ʼéláֽy׃

16
כֹּ֚ה אָמַ֣ר יְהוָ֔ה הִנְנִ֨י מֵבִ֥יא רָעָ֛ה אֶל־הַמָּקֹ֥ום הַזֶּ֖ה וְעַל־יֹֽשְׁבָ֑יו אֵ֚ת כָּל־דִּבְרֵ֣י הַסֵּ֔פֶר אֲשֶׁ֥ר קָרָ֖א מֶ֥לֶךְ יְהוּדָֽה׃

kò֚̇h ʼáma֣r yĕhwá֔h hinĕni֨y mébi֥yʼ ráʻá֛h ʼel־hamá̇qò֥wm hazė֖h wĕʻal־yòֽşĕ̌bá֑yw ʼé֚ţ ká̇l־di̇bĕré֣y hasé̇֔per ʼàşě֥r qárá֖ʼ me֥lekĕ yĕhẇdáֽh׃

17
תַּ֣חַת׀ אֲשֶׁ֣ר עֲזָב֗וּנִי וַֽיְקַטְּרוּ֙ לֵאלֹהִ֣ים אֲחֵרִ֔ים לְמַ֨עַן֙ הַכְעִיסֵ֔נִי בְּכֹ֖ל מַעֲשֵׂ֣ה יְדֵיהֶ֑ם וְנִצְּתָ֧ה חֲמָתִ֛י בַּמָּקֹ֥ום הַזֶּ֖ה וְלֹ֥א תִכְבֶּֽה׃

ţȧ֣ẖaţ׀ ʼàşě֣r ʻàzáb֗ẇniy waֽyĕqatĕ̇rẇ֙ léʼlòhi֣ym ʼàẖéri֔ym lĕma֨ʻan֙ hakĕʻiysé֔niy bĕ̇kò֖l maʻàşé֣̂h yĕdéyhe֑m wĕniẕĕ̇ţá֧h ẖàmáţi֛y bȧmá̇qò֥wm hazė֖h wĕlò֥ʼ ţikĕbėֽh׃

18
וְאֶל־מֶ֣לֶךְ יְהוּדָ֗ה הַשֹּׁלֵ֤חַ אֶתְכֶם֙ לִדְרֹ֣שׁ אֶת־יְהוָ֔ה כֹּ֥ה תֹאמְר֖וּ אֵלָ֑יו כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל הַדְּבָרִ֖ים אֲשֶׁ֥ר שָׁמָֽעְתָּ׃

wĕʼel־me֣lekĕ yĕhẇdá֗h haşò̇̌lé֤ẖa ʼeţĕkem֙ lidĕrò֣ş̌ ʼeţ־yĕhwá֔h kò֥̇h ţòʼmĕr֖ẇ ʼélá֑yw kòֽ̇h־ʼáma֤r yĕhwáh֙ ʼèlòhé֣y yişĕ̂ráʼé֔l hadĕ̇bári֖ym ʼàşě֥r şá̌máֽʻĕţá̇׃

19
יַ֠עַן רַךְ־לְבָ֨בְךָ֜ וַתִּכָּנַ֣ע׀ מִפְּנֵ֣י יְהוָ֗ה בְּֽשָׁמְעֲךָ֡ אֲשֶׁ֣ר דִּבַּרְתִּי֩ עַל־הַמָּקֹ֨ום הַזֶּ֜ה וְעַל־יֹשְׁבָ֗יו לִהְיֹ֤ות לְשַׁמָּה֙ וְלִקְלָלָ֔ה וַתִּקְרַע֙ אֶת־בְּגָדֶ֔יךָ וַתִּבְכֶּ֖ה לְפָנָ֑י וְגַ֧ם אָנֹכִ֛י שָׁמַ֖עְתִּי נְאֻם־יְהוָֽה׃

ya֠ʻan rakĕ־lĕbá֨bĕká֜ waţi̇ká̇na֣ʻ׀ mipĕ̇né֣y yĕhwá֗h bĕֽ̇şá̌mĕʻàká֡ ʼàşě֣r di̇bȧrĕţi̇y֩ ʻal־hamá̇qò֨wm hazė֜h wĕʻal־yòşĕ̌bá֗yw lihĕyò֤wţ lĕşǎmá̇h֙ wĕliqĕlálá֔h waţi̇qĕraʻ֙ ʼeţ־bĕ̇gáde֔yká waţi̇bĕkė֖h lĕpáná֑y wĕga֧m ʼánòki֛y şá̌ma֖ʻĕţi̇y nĕʼum־yĕhwáֽh׃

20
לָכֵן֩ הִנְנִ֨י אֹֽסִפְךָ֜ עַל־אֲבֹתֶ֗יךָ וְנֶאֱסַפְתָּ֣ אֶל־קִבְרֹתֶיךָ֮ בְּשָׁלֹום֒ וְלֹא־תִרְאֶ֣ינָה עֵינֶ֔יךָ בְּכֹל֙ הָֽרָעָ֔ה אֲשֶׁר־אֲנִ֥י מֵבִ֖יא עַל־הַמָּקֹ֣ום הַזֶּ֑ה וַיָּשִׁ֥יבוּ אֶת־הַמֶּ֖לֶךְ דָּבָֽר׃

lákén֩ hinĕni֨y ʼòֽsipĕká֜ ʻal־ʼàbòţe֗yká wĕneʼèsapĕţá֣̇ ʼel־qibĕròţeyká֮ bĕ̇şá̌lòwm֒ wĕlòʼ־ţirĕʼe֣ynáh ʻéyne֔yká bĕ̇kòl֙ háֽráʻá֔h ʼàşěr־ʼàni֥y mébi֖yʼ ʻal־hamá̇qò֣wm hazė֑h wayá̇şǐ֥ybẇ ʼeţ־hamė֖lekĕ dá̇báֽr׃