Bibles in ancient languages
Old translations
Modern translations

Septante Psalms 17

Pentateuch
Historical books
Poetical Writings
Prophetic Books
Chapter
Verses
1
Εἰς τὸ τέλος· τῷ παιδὶ κυρίου τῷ Δαυιδ, ἃ ἐλάλησεν τῷ κυρίῳ τοὺς λόγους τῆς ᾠδῆς ταύτης ἐν ἡμέρᾳ, ᾗ ἐρρύσατο αὐτὸν κύριος ἐκ χειρὸς πάντων τῶν ἐχθρῶν αὐτοῦ καὶ ἐκ χειρὸς Σαουλ,

Eis tò télos: tō̂i paidì kyríou tō̂i Dauid, hà elálēsen tō̂i kyríōi toùs lógous tē̂s ōidē̂s taútēs en hēmérāi, hē̂i errýsato autòn kýrios ek cheiròs pántōn tō̂n echthrō̂n autoû kaì ek cheiròs Saoul,

2
καὶ εἶπεν ’Αγαπήσω σε, κύριε ἡ ἰσχύς μου.

kaì eîpen ’Agapḗsō se, kýrie hē ischýs mou.

3
κύριος στερέωμά μου καὶ καταϕυγή μου καὶ ῥύστης μου, ὁ θεός μου βοηθός μου, καὶ ἐλπιῶ ἐπ’ αὐτόν, ὑπερασπιστής μου καὶ κέρας σωτηρίας μου, ἀντιλήμπτωρ μου.

kýrios steréōmá mou kaì kataphygḗ mou kaì rhýstēs mou, ho theós mou boēthós mou, kaì elpiō̂ ep’ autón, hyperaspistḗs mou kaì kéras sōtērías mou, antilḗmptōr mou.

4
αἰνῶν ἐπικαλέσομαι κύριον καὶ ἐκ τῶν ἐχθρῶν μου σωθήσομαι.

ainō̂n epikalésomai kýrion kaì ek tō̂n echthrō̂n mou sōthḗsomai.

5
περιέσχον με ὠδῖνες θανάτου, καὶ χείμαρροι ἀνομίας ἐξετάραξάν με

periéschon me ōdînes thanátou, kaì cheímarroi anomías exetáraxán me

6
ὠδῖνες ᾅδου περιεκύκλωσάν με, προέϕθασάν με παγίδες θανάτου.

ōdînes hā́idou periekýklōsán me, proéphthasán me pagídes thanátou.

7
καὶ ἐν τῷ θλίβεσθαί με ἐπεκαλεσάμην τὸν κύριον καὶ πρὸς τὸν θεόν μου ἐκέκραξα· ἤκουσεν ἐκ ναοῦ ἁγίου αὐτοῦ ϕωνῆς μου, καὶ ἡ κραυγή μου ἐνώπιον αὐτοῦ εἰσελεύσεται εἰς τὰ ὦτα αὐτοῦ.

kaì en tō̂i thlíbesthaí me epekalesámēn tòn kýrion kaì pròs tòn theón mou ekékraxa: ḗkousen ek naoû hagíou autoû phōnē̂s mou, kaì hē kraugḗ mou enṓpion autoû eiseleúsetai eis tà ō̂ta autoû.

8
καὶ ἐσαλεύθη καὶ ἔντρομος ἐγενήθη ἡ γῆ, καὶ τὰ θεμέλια τῶν ὀρέων ἐταράχθησαν καὶ ἐσαλεύθησαν, ὅτι ὠργίσθη αὐτοῖς ὁ θεός.

kaì esaleúthē kaì éntromos egenḗthē hē gē̂, kaì tà themélia tō̂n oréōn etaráchthēsan kaì esaleúthēsan, hóti ōrgísthē autoîs ho theós.

9
ἀνέβη καπνὸς ἐν ὀργῇ αὐτοῦ, καὶ πῦρ ἀπὸ προσώπου αὐτοῦ κατεϕλόγισεν, ἄνθρακες ἀνήϕθησαν ἀπ’ αὐτοῦ.

anébē kapnòs en orgē̂i autoû, kaì pŷr apò prosṓpou autoû katephlógisen, ánthrakes anḗphthēsan ap’ autoû.

10
καὶ ἔκλινεν οὐρανὸν καὶ κατέβη, καὶ γνόϕος ὑπὸ τοὺς πόδας αὐτοῦ.

kaì éklinen ouranòn kaì katébē, kaì gnóphos hypò toùs pódas autoû.

11
καὶ ἐπέβη ἐπὶ χερουβιν καὶ ἐπετάσθη, ἐπετάσθη ἐπὶ πτερύγων ἀνέμων.

kaì epébē epì cheroubin kaì epetásthē, epetásthē epì pterýgōn anémōn.

12
καὶ ἔθετο σκότος ἀποκρυϕὴν αὐτοῦ· κύκλῳ αὐτοῦ ἡ σκηνὴ αὐτοῦ, σκοτεινὸν ὕδωρ ἐν νεϕέλαις ἀέρων.

kaì étheto skótos apokryphḕn autoû: kýklōi autoû hē skēnḕ autoû, skoteinòn hýdōr en nephélais aérōn.

13
ἀπὸ τῆς τηλαυγήσεως ἐνώπιον αὐτοῦ αἱ νεϕέλαι διῆλθον, χάλαζα καὶ ἄνθρακες πυρός.

apò tē̂s tēlaugḗseōs enṓpion autoû hai nephélai diē̂lthon, chálaza kaì ánthrakes pyrós.

14
καὶ ἐβρόντησεν ἐξ οὐρανοῦ κύριος, καὶ ὁ ὕψιστος ἔδωκεν ϕωνὴν αὐτοῦ·

kaì ebróntēsen ex ouranoû kýrios, kaì ho hýpsistos édōken phōnḕn autoû:

15
καὶ ἐξαπέστειλεν βέλη καὶ ἐσκόρπισεν αὐτοὺς καὶ ἀστραπὰς ἐπλήθυνεν καὶ συνετάραξεν αὐτούς.

kaì exapésteilen bélē kaì eskórpisen autoùs kaì astrapàs eplḗthynen kaì synetáraxen autoús.

16
καὶ ὤϕθησαν αἱ πηγαὶ τῶν ὑδάτων, καὶ ἀνεκαλύϕθη τὰ θεμέλια τῆς οἰκουμένης ἀπὸ ἐπιτιμήσεώς σου, κύριε, ἀπὸ ἐμπνεύσεως πνεύματος ὀργῆς σου.

kaì ṓphthēsan hai pēgaì tō̂n hydátōn, kaì anekalýphthē tà themélia tē̂s oikouménēs apò epitimḗseṓs sou, kýrie, apò empneúseōs pneúmatos orgē̂s sou.

17
ἐξαπέστειλεν ἐξ ὕψους καὶ ἔλαβέν με, προσελάβετό με ἐξ ὑδάτων πολλῶν.

exapésteilen ex hýpsous kaì élabén me, proselábetó me ex hydátōn pollō̂n.

18
ῥύσεταί με ἐξ ἐχθρῶν μου δυνατῶν καὶ ἐκ τῶν μισούντων με, ὅτι ἐστερεώθησαν ὑπὲρ ἐμέ.

rhýsetaí me ex echthrō̂n mou dynatō̂n kaì ek tō̂n misoúntōn me, hóti estereṓthēsan hypèr emé.

19
προέϕθασάν με ἐν ἡμέρᾳ κακώσεώς μου, καὶ ἐγένετο κύριος ἀντιστήριγμά μου

proéphthasán me en hēmérāi kakṓseṓs mou, kaì egéneto kýrios antistḗrigmá mou

20
καὶ ἐξήγαγέν με εἰς πλατυσμόν, ῥύσεταί με, ὅτι ἠθέλησέν με. [ῥύσεταί με ἐξ ἐχθρῶν μου δυνατῶν καὶ ἐκ τῶν μισούντων με.]

kaì exḗgagén me eis platysmón, rhýsetaí me, hóti ēthélēsén me. [rhýsetaí me ex echthrō̂n mou dynatō̂n kaì ek tō̂n misoúntōn me.]

21
καὶ ἀνταποδώσει μοι κύριος κατὰ τὴν δικαιοσύνην μου καὶ κατὰ τὴν καθαριότητα τῶν χειρῶν μου ἀνταποδώσει μοι,

kaì antapodṓsei moi kýrios katà tḕn dikaiosýnēn mou kaì katà tḕn kathariótēta tō̂n cheirō̂n mou antapodṓsei moi,

22
ὅτι ἐϕύλαξα τὰς ὁδοὺς κυρίου καὶ οὐκ ἠσέβησα ἀπὸ τοῦ θεοῦ μου,

hóti ephýlaxa tàs hodoùs kyríou kaì ouk ēsébēsa apò toû theoû mou,

23
ὅτι πάντα τὰ κρίματα αὐτοῦ ἐνώπιόν μου, καὶ τὰ δικαιώματα αὐτοῦ οὐκ ἀπέστησα ἀπ’ ἐμοῦ.

hóti pánta tà krímata autoû enṓpión mou, kaì tà dikaiṓmata autoû ouk apéstēsa ap’ emoû.

24
καὶ ἔσομαι ἄμωμος μετ’ αὐτοῦ καὶ ϕυλάξομαι ἀπὸ τῆς ἀνομίας μου.

kaì ésomai ámōmos met’ autoû kaì phyláxomai apò tē̂s anomías mou.

25
καὶ ἀνταποδώσει μοι κύριος κατὰ τὴν δικαιοσύνην μου καὶ κατὰ τὴν καθαριότητα· τῶν χειρῶν μου ἐνώπιον τῶν ὀϕθαλμῶν αὐτοῦ.

kaì antapodṓsei moi kýrios katà tḕn dikaiosýnēn mou kaì katà tḕn kathariótēta: tō̂n cheirō̂n mou enṓpion tō̂n ophthalmō̂n autoû.

26
μετὰ ὁσίου ὁσιωθήσῃ καὶ μετὰ ἀνδρὸς ἀθῴου ἀθῷος ἔσῃ

metà hosíou hosiōthḗsēi kaì metà andròs athṓiou athō̂ios ésēi

27
καὶ μετὰ ἐκλεκτοῦ ἐκλεκτὸς ἔσῃ καὶ μετὰ στρεβλοῦ διαστρέψεις.

kaì metà eklektoû eklektòs ésēi kaì metà strebloû diastrépseis.

28
ὅτι σὺ λαὸν ταπεινὸν σώσεις καὶ ὀϕθαλμοὺς ὑπερηϕάνων ταπεινώσεις.

hóti sỳ laòn tapeinòn sṓseis kaì ophthalmoùs hyperēphánōn tapeinṓseis.

29
ὅτι σὺ ϕωτιεῖς λύχνον μου, κύριε· ὁ θεός μου, ϕωτιεῖς τὸ σκότος μου.

hóti sỳ phōtieîs lýchnon mou, kýrie: ho theós mou, phōtieîs tò skótos mou.

30
ὅτι ἐν σοὶ ῥυσθήσομαι ἀπὸ πειρατηρίου καὶ ἐν τῷ θεῷ μου ὑπερβήσομαι τεῖχος.

hóti en soì rhysthḗsomai apò peiratēríou kaì en tō̂i theō̂i mou hyperbḗsomai teîchos.

31
ὁ θεός μου, ἄμωμος ἡ ὁδὸς αὐτοῦ, τὰ λόγια κυρίου πεπυρωμένα, ὑπερασπιστής ἐστιν πάντων τῶν ἐλπιζόντων ἐπ’ αὐτόν.

ho theós mou, ámōmos hē hodòs autoû, tà lógia kyríou pepyrōména, hyperaspistḗs estin pántōn tō̂n elpizóntōn ep’ autón.

32
ὅτι τίς θεὸς πλὴν τοῦ κυρίου; καὶ τίς θεὸς πλὴν τοῦ θεοῦ ἡμῶν;

hóti tís theòs plḕn toû kyríou? kaì tís theòs plḕn toû theoû hēmō̂n?

33
ὁ θεὸς ὁ περιζωννύων με δύναμιν καὶ ἔθετο ἄμωμον τὴν ὁδόν μου,

ho theòs ho perizōnnýōn me dýnamin kaì étheto ámōmon tḕn hodón mou,

34
ὁ καταρτιζόμενος τοὺς πόδας μου ὡς ἐλάϕου καὶ ἐπὶ τὰ ὑψηλὰ ἱστῶν με,

ho katartizómenos toùs pódas mou hōs eláphou kaì epì tà hypsēlà histō̂n me,

35
διδάσκων χεῖράς μου εἰς πόλεμον καὶ ἔθου τόξον χαλκοῦν τοὺς βραχίονάς μου·

didáskōn cheîrás mou eis pólemon kaì éthou tóxon chalkoûn toùs brachíonás mou:

36
καὶ ἔδωκάς μοι ὑπερασπισμὸν σωτηρίας μου, καὶ ἡ δεξιά σου ἀντελάβετό μου, καὶ ἡ παιδεία σου ἀνώρθωσέν με εἰς τέλος, καὶ ἡ παιδεία σου αὐτή με διδάξει.

kaì édōkás moi hyperaspismòn sōtērías mou, kaì hē dexiá sou antelábetó mou, kaì hē paideía sou anṓrthōsén me eis télos, kaì hē paideía sou autḗ me didáxei.

37
ἐπλάτυνας τὰ διαβήματά μου ὑποκάτω μου, καὶ οὐκ ἠσθένησαν τὰ ἴχνη μου.

eplátynas tà diabḗmatá mou hypokátō mou, kaì ouk ēsthénēsan tà íchnē mou.

38
καταδιώξω τοὺς ἐχθρούς μου καὶ καταλήμψομαι αὐτοὺς καὶ οὐκ ἀποστραϕήσομαι, ἕως ἂν ἐκλίπωσιν·

katadiṓxō toùs echthroús mou kaì katalḗmpsomai autoùs kaì ouk apostraphḗsomai, héōs àn eklípōsin:

39
ἐκθλίψω αὐτούς, καὶ οὐ μὴ δύνωνται στῆναι, πεσοῦνται ὑπὸ τοὺς πόδας μου.

ekthlípsō autoús, kaì ou mḕ dýnōntai stē̂nai, pesoûntai hypò toùs pódas mou.

40
καὶ περιέζωσάς με δύναμιν εἰς πόλεμον, συνεπόδισας πάντας τοὺς ἐπανιστανομένους ἐπ’ ἐμὲ ὑποκάτω μου

kaì periézōsás me dýnamin eis pólemon, synepódisas pántas toùs epanistanoménous ep’ emè hypokátō mou

41
καὶ τοὺς ἐχθρούς μου ἔδωκάς μοι νῶτον καὶ τοὺς μισοῦντάς με ἐξωλέθρευσας.

kaì toùs echthroús mou édōkás moi nō̂ton kaì toùs misoûntás me exōléthreusas.

42
ἐκέκραξαν, καὶ οὐκ ἦν ὁ σῴζων, πρὸς κύριον, καὶ οὐκ εἰσήκουσεν αὐτῶν.

ekékraxan, kaì ouk ē̂n ho sṓizōn, pròs kýrion, kaì ouk eisḗkousen autō̂n.

43
καὶ λεπτυνῶ αὐτοὺς ὡς χοῦν κατὰ πρόσωπον ἀνέμου, ὡς πηλὸν πλατειῶν λεανῶ αὐτούς.

kaì leptynō̂ autoùs hōs choûn katà prósōpon anémou, hōs pēlòn plateiō̂n leanō̂ autoús.

44
ῥύσῃ με ἐξ ἀντιλογιῶν λαοῦ, καταστήσεις με εἰς κεϕαλὴν ἐθνῶν· λαός, ὃν οὐκ ἔγνων, ἐδούλευσέν μοι,

rhýsēi me ex antilogiō̂n laoû, katastḗseis me eis kephalḕn ethnō̂n: laós, hòn ouk égnōn, edoúleusén moi,

45
εἰς ἀκοὴν ὠτίου ὑπήκουσέν μοι· υἱοὶ ἀλλότριοι ἐψεύσαντό μοι,

eis akoḕn ōtíou hypḗkousén moi: hyioì allótrioi epseúsantó moi,

46
υἱοὶ ἀλλότριοι ἐπαλαιώθησαν καὶ ἐχώλαναν ἀπὸ τῶν τρίβων αὐτῶν.

hyioì allótrioi epalaiṓthēsan kaì echṓlanan apò tō̂n tríbōn autō̂n.

47
ζῇ κύριος, καὶ εὐλογητὸς ὁ θεός μου, καὶ ὑψωθήτω ὁ θεὸς τῆς σωτηρίας μου,

zē̂i kýrios, kaì eulogētòs ho theós mou, kaì hypsōthḗtō ho theòs tē̂s sōtērías mou,

48
ὁ θεὸς ὁ διδοὺς ἐκδικήσεις ἐμοὶ καὶ ὑποτάξας λαοὺς ὑπ’ ἐμέ,

ho theòs ho didoùs ekdikḗseis emoì kaì hypotáxas laoùs hyp’ emé,

49
ὁ ῥύστης μου ἐξ ἐχθρῶν μου ὀργίλων, ἀπὸ τῶν ἐπανιστανομένων ἐπ’ ἐμὲ ὑψώσεις με, ἀπὸ ἀνδρὸς ἀδίκου ῥύσῃ με.

ho rhýstēs mou ex echthrō̂n mou orgílōn, apò tō̂n epanistanoménōn ep’ emè hypsṓseis me, apò andròs adíkou rhýsēi me.

50
διὰ τοῦτο ἐξομολογήσομαί σοι ἐν ἔθνεσιν, κύριε, καὶ τῷ ὀνόματί σου ψαλῶ,

dià toûto exomologḗsomaí soi en éthnesin, kýrie, kaì tō̂i onómatí sou psalō̂,

51
μεγαλύνων τὰς σωτηρίας τοῦ βασιλέως αὐτοῦ καὶ ποιῶν ἔλεος τῷ χριστῷ αὐτοῦ, τῷ Δαυιδ καὶ τῷ σπέρματι αὐτοῦ ἕως αἰῶνος.

megalýnōn tàs sōtērías toû basiléōs autoû kaì poiō̂n éleos tō̂i christō̂i autoû, tō̂i Dauid kaì tō̂i spérmati autoû héōs aiō̂nos.